У прасторы экспазіцыі “Кватэра-майстэрня мінскага краўца” пачынае працаваць часовая выстава “Пасярэбраныя вырабы 2-й пал. ХІХ – пач. ХХ ст.” Гэта 2 дзясяткі прадметаў для сервіроўкі абедзеннага стала – лыжкі, відэльцы, цукраніцы, падносы – вырабы варшаўскіх фабрык Norblin, Fraget і інш.

У Расійскай імперыі ХІХ – пач. ХХ ст. асноўная вытворчасць пасярэбраных вырабаў была сканцэнтравана ў Варшаве. Гэтаму спрыяла ільготная палітыка царскага ўрада, якая прадугледжвала прывілеі іншаземным прамыслоўцам, з мэтай прыцягнення іх капіталаў ў Царства Польскае, а таксама геаграфічная блізкасць да буйных цэнтраў вытворчасці Заходняй Еўропы. Варшаўскія прадпрыемствы пастаўлялі прадукцыю на неабсяжны рынак расійскай дзяржавы. На беларускіх землях дзейнічалі склады  фірмы Norblin у Мінску і Магілёве, а фірма Fraget мела свае крамы ў Гродна і Мінску. Дзякуючы невысокаму кошту і вытанчанаму знешняму выгляду пасярэбраныя вырабы карысталіся попытам у шырокага кола спажыўцоў, перш за ўсё ў гараджан з сярэднім узроўнем дастатку. Набыццё прадметаў, знешне падобных на дарагія вырабы з чыстага срэбра, дазваляла ўладальнікам адчуць сябе прыналежнымі да арыстакратыі.

Запрашаем наведвальнікаў пазнаёміцца з новай выставай, а таксама з каталогам пасярэбраных вырабаў – вынікам навуковай працы калектыва музейных супрацоўнікаў.

Выстава размешчана ў помніку архітэктуры “Дом з вул. Вызвалення, 4 г. Мінска”.

etna.by