Інтэрактыўныя экскурсіі
Галоўная Паслугі Інтэрактыўныя экскурсіі
Інтэрактыўныя экскурсіі

Паважаныя наведвальнікі! Звярніце ўвагу: акрамя аплаты экскурсійных праграм кожны наведвальнік аплачвае ўваходны квіток!

Гульнёвая праграма

«Гуляем Масленку»

 38,00 бел.руб. з групы

Люты - сакавік

60 хв.

Да 25 чал.

Праграма для вучняў пачатковай школы. Новая знаёмая дзяцей – Параскева распавядзе пра Масленіцу, асаблівасці кожнага дня масленічнага тыдня, народныя традыцыі і абрады.

Масленіца – час забаваў, і таму маленькіх наведвальнікаў чакаюць розныя гульні, а таксама карагод вакол пудзіла Зімы.  У дзяцей будзе магчымасць зрабіць абракальныя лялькі сваімі рукамі і загадаць жаданне.

Экскурсійнае абслугоўванне з інтэрактыўнымі элементамі «Масленіца»

 46,00 бел.руб. з групы

Люты - сакавік

50 хв.

Да 25 чал.

Масленіца святкавалася нашымі продкамі па заканчэнні зімы і на пачатку вясны, што выяўлялася як провады зімы і чаканне хуткага прыходу вясны. Гэта свята не магчыма ўявіць без гучных песень, народных гульняў і абдаў і, канешне ж, без бліноў!

Наша масленічная праграма цудоўна падыходзіць для актыўных і незвычайных карпаратываў, а таксама для яскравых сяброўскіх сустрэч! Запрашаем вас адсвяткаваць Масленіцу ў музеі пад адкрытым небам, дзе вы зможаце апынуцца ў сапраўднай беларускай вёсцы, прыняць ўдзел у народных абрадах, пачаставацца блінамі і даведацца шмат чаго цікавага пра свята Масленіцы на беларускіх землях.

Дадзенная праграма ўключае ў сабе абрады, з дапамогай якіх вы дакладна прыблізіце прыход цёплай вясны і забяспечыце добры ўраджай, як рабілі гэта нашы продкі.

Паколькі ад Каляд да Вялікага посту ладзіліся вяселлі, многія масленічныя дзеянні былі скіраваны на сямейна-шлюбныя адносіны людзей, таму вы зможаце паўдзельнічаць і ў адным з такіх абрадаў, які называецца “калодка”. “Калодку” вешалі нежанатым хлопцам, а тыя мусілі ад яе адкупіцца спевамі ці танцамі альбо насіць яе да заканчэння свята.

Пад час экскурсіі вы пабачыце цудоўныя прадметы, якія выкарыстоўваліся беларусамі для вырабу сыру, творагу і масла, а таксама даведаецеся ад сапраўднай гаспадыні як нашы продкі захоўвалі гэтыя прадукты і калі пачыналі рыхтавацца да Масленіцы. І атрымаеце ад гасціннай гаспадыні масленічны пачастунак!

На прыканцы вы зможаце пакатацца з гары! Гэта было неабходна для таго, каб вырас даўгі лён: чым далей вы пракаціцеся, тым больш добры будзе ўраджай. Але, зразумела, гэта магчыма толькі пры наяўнасці снегу, то бок пры спрыяльным надвор’і. Але не варта ўпадаць у роспач! Доўгі лён і добры ўраджай можа “выклікаць” і гушканне на арэлях!

Таксама наблізіць доўгачаканую вясну дапамогуць карагод і гучныя беларускія спевы!

Экскурсійнае абслугоўванне з ітэрактыўнымі элементамі «Камаедзіца»

 22,00 бел. руб. з групы

Сакавік - май

90 хв.

Да 25 чал.

Экскурсія прысвечана страчанай народнай традыцыі нашых продкаў – пакланенню мядзведзю-бацюхне. Камаедзіца – старажытнае свята, якое адзначалі ў пачатку сакавіка перад Дабравешчаннем, калі прабуджаўся мядзведзь і выходзіў з бярлогі. Сяляне імкнуліся задобрыць звера, каб ён не шкодзіў і не выклікаў страх у людзей. Экскурсія ўключае знаёмства з цікавай выставай “Пчалярства на Беларусі” і суправаджаецца рухомымі гульнямі і жывой народнай музыкай.

Экскурсійнае абслугоўванне з інтэрактыўнымі элементамі «Вандроўка ў мінулае»

 32,00 бел. руб. з групы

Люты - снежань

100 хв.

Да 25 чал.

Падчас гэтай вясёлай экскурсіі наведвальнікі вандруюць па музейным сяле і знаёмяцца з помнікамі архітэктуры і іх інтэр’ерамі. Пасля ім прадастаюляецца магчымасць пагуляць у традыцыйныя гульні і патанцаваць беларускія народныя танцы пад акампанемент жывой музыкі.

У маршрут уключаны: уніяцкая Свята-Пакроўская царква 18 стагоддзя, грамадскі свіран 19 стагоддзя, кузня, школа і гумно пачатку 20 стагоддзя. У экскурсію таксама ўваходзіць паказ комплексаў трох сядзібаў, на прыкладзе якіх паказана развіццё, характэрнага для рэгіёну «Цэнтральная Беларусь», пагоннага (лінейнага) сялянскага двара.

Экскурсійнае абслугоўванне з інтэрактыўнымі элементамі «Пшанічны каласок»

 13,50 бел. руб. з групы

 

 Да 25 чал.

 Экскурсія “Пшанічны каласок” разлічана на дзіцяцую аўдыторыю (1-2 клас) і прадугледжвае інтэрактыўную форму адукацыі . Дзеці, вандруючы ў  часе, апынуцца ў старажытным сяле, дзе ў гульнёвай форме распавядаецца аб працэсе ператварэння маленькіх зярнятак у духмяны бохан хлеба. Сустрэча з Дамавіком, які замесіць цеста, а па завяршэнні праграмы пачастуе хлебам, застанецца надоўга ў памяці маленькіх наведвальнікаў.

Экскурсійнае абслугоўванне з інтэрактыўнымі элементамі «Падарожжа ў краіну казак»

  12,00 бел. руб. з групы

 

Да 25 чал.

 Экскурсія разлічана на вучняў пачатковай школы (1-2 клас).  З дапамогай чароўнай стужкі дзеці, вандруючы ў часе, апынуцца ў старым сяле, пазнаёмяцца з дамавіком Янкай і іншымі персанажамі, даведаюцца пра новыя гісторыі і пагуляюць ў цікавыя гульні.

Экскурсійнае абслугоўванне з інтэрактыўнымі элементамі «Прыгоды ў краіне Зюзі»

 125,00 бел. руб. з  групы

 

Да 25 чал.

 На зімовую экскурсію “Прыгоды ў краіне Зюзі” запрашаюцца школьнікі (1-6 клас). Сама Завея правядзе дзяцей у казачны свет Зюзі, дзе шмат прыгод, загадак і гульняў. Наведвальнікі апынуцца ў казцы з таямнічай Зяляркай, адкажуць на заблытаныя пытанні Цмока і  убачаць яго агністае шоў. Удзельнікі дапамогуць вярнуць Зюзе яго зімовую сілу, заключаную у посаху, які скрала злая Баба Яга. Зюзя пачастуе гарбатай і запросіць гасцей паўдзельнічаць у традыцыйных зімовых гульнях.

Экскурсійнае абслугоўванне з інтэрактыўнымі элементамі  «Дзівосны свет народнай фантазіі»

 35,00 бел. руб. з групы

 

Да 25 чал.

 Знаёмства дзяцей і дарослых з персанажамі беларускай міфалогіі і жыхарамі незвычайнай вёскі адбудзецца падчас экскурсіі “Дзівосны свет народнай фантазіі”. Наведвальнікі сустрэнуцца з Хатнікам, Жыжалем, Мельнікам, Зяляркай і іншымі персанажамі. Кульмінацыяй падарожжа будзе карагод і жывая народная музыка.

Музейна-педагагічны занятак "Квэст "Зачараваная вёска"

53,00 бел. руб. з групы

 

Да 25 чал.

 Рухомая гульня-пошук. Удзельнікі ўвесь час перамяшчаюцца па музеі, каардынуюцца вядучым гульні. Касцюміраваныя персанажы (Зелярка, Баба Гэля, Карчмар, Мужык Дзям'ян) загадваюць загадкі і даюць заданні групам удзельнікаў.