Музейны занятак «Беларускі лён»

Запрашаем на музейныя заняткі!

Лён вядомы чалавеку вельмі даўно, яго выкарыстоўвалі яшчэ ў старажытным Егіпце. Чалавек заўважыў карысныя якасці расліны: валакно выкарыстоўвалі для прадзення і ткацтва, ільняную кастру – як уцяпляльнік і паліва, семя – для выціскання алею, які ішоў на выраб аліфы, фарбаў; выкарыстоўвалася для лекавых націранняў, мазяў, а таксама ў ежу. Такім чынам, ільноапрацоўка, па сутнасці, безадходная вытворчасць. На Беларусі лён з’яўляўся асноўнай сыравінай для вырабу тканін у хатніх умовах.

Экспазіцыя «Беларускі лён» размешчана на тэрыторыі помніка архітэктуры «Сядзіба з в. Заброддзе Стаўбцоўскага раёна» ў будынку гумна. Аснову экспазіцыі склалі музейныя прадметы сабраныя ў шматлікіх экспедыцыях па тэрыторыі Беларусі. Падчас музейнага занятка вы даведаецеся:

• як беларусы вырошчвалі лён, якімі прыкметамі кіраваліся падчас сяўбы, якія існавалі павер’і і традыцыі, звязаныя з часам пасадкі, збору ўраджаю.
• як сцябло расліны пераўтваралася ў валакно, якімі прыладамі карысталіся сяляне пры трапанні ільну?
• як жанчыны рыхтавалі пражу, што такое «попрадкі», і што рабілі беларускія дзяўчаты доўгімі восеньскімі вечарамі?
• чым раней фарбавалі ніткі, што такое «жлукта», «матавіла»?
• з якіх дэталяў складаліся кросны (ткацкі станок), як іх выраблялі?

Апроч тэарэтычнай часткі ў музейным занятку прадугледжаны ўдзел наведвальнікаў у працэсах апрацоўкі ільну: мяцці, трапанні, расчэсванні валакна; падчас занятку наведвальнікі змогуць назіраць ткацкі працэс і паўдзельнічаць у ім.