У Горацкім раённым гісторыка-этнаграфічным музеі маштабна адбылося ўрачыстае адкрыццё выставы "Беларускія ветракі". Яна арганізавана Беларускім дзяржаўным музеем народнай архітэктуры і побыту разам з нашым раённым музеем у рамках рэалізацыі сумеснага праекта па супрацоўніцтве і ўзаемадзеянні.

У адкрыцці выставы прынялі ўдзел намеснік старшыні Горацкага райвыканкама Ларыса Крывіцкая, начальнік аддзела культуры райвыканкама Вольга Панасюк, намеснік дырэктара Беларускага дзяржаўнага музея народнай архітэктуры і побыту Яўген Мікула, загадчык навукова-экспазіцыйнага аддзела Ігар Іваноў.

Ларыса Крывіцкая ў прывітальным слове адзначыла важнасць фотавыставы, якая дапамагае большай колькасці людзей убачыць унікальныя экспанаты музея архітэктуры і побыту.

Вялікую цікавасць выклікала прэзентацыя, якую прадставіў Ігар Іваноў. Яна па сутнасці і стала адкрыццём гэтай выставы. Ён падрабязна расказаў і паказаў на экране ўсё пра млыны ў Беларусі, іх віды, колькасць у розныя гады, дзе і як выкарыстоўваліся.

Яўген Мікула ў сваю чаргу падарыў музею шэраг кніг, навуковых выданняў аб млынах Беларусі.

Наведаць выставу і азнаёміцца з яе экспазіцыяй можна будзе цягам двух месяцаў. Прадстаўнікі Беларускага дзяржаўнага музея народнай архітэктуры і побыту пакінулі свае прэзентацыі і матэрыялы для азнаямлення.

Крыніца: Горацкія Навіны