Аб'яўляем конкурс дудароў і гарманістаў!

Зусім хутка прыйдзе час развітвацца з казачнай, марознай зімой і сустракаць цёплую, сонечную, веснавую пару. Далучайцеся да святкавання: спачатку мы праводзім зімачку з усёй пашанай, падзякуем яе за чараўніцтва, скрыпучыя маразы, пухнаты снег і як трэба паклічам доўгачаканае цяпло.

Людзі спрадвеку прыдумлялі розныя спосабы ўрачыстых праводзінаў зімы, каб тая хутчэй саступіла месца радасці вясновага адраджэння. Такім з'яўляецца смачнае і вясёлае свята «Масленіца», якое ў нашым музеі традыцыйна праходзіць з размахам: архаічныя абрады, жывая музыка, конкурсы, пачастункі, вялікая колькасць забаў для наведвальнікаў усіх узростаў і шмат іншага для самага лепшага адпачынку. Гэты год не стане выключэннем, нішто не зможа ўтаймаваць нястрымную народную весялосць.

Для таго, каб кожны, нават самы зацішны куточак нашага музейнага комплексу напоўніўся чароўнымі мелодыямі старадаўніх народных інструментаў, мы аб'яўляем конкурс дудароў і гарманістаў.

Усіх, хто валодае гэтымі музычнымі інструментамі, хоча ад душы пайграць і атрымаць за гэта прыз, мы запрашаем прыняць удзел у конкурсе, які адбудзецца 25.02.2017 г. з 12:00 да 16:00 падчас правядзення мерапрыемства «Масленіца».

Заяўкі дасылайце ў вольнай форме, з указаннем імя, назвы музычнага інструмента і кантактнага тэлефона, на адрас электроннай пошты etnamuseum@gmail.com з паметкай «конкурс музыкаў» у тэме ліста.