Фотасправаздача

«Абрадавае мерапрыемства «Шчадрэц»

12 студзеня 2019 года 

Даўні звычай адзначаць вечар напярэдадні Новага года паводле старога стылю называўся Шчодрык, Шчадрэц. У гэты дзень гатавалі другую (багатую, шчодрую) куццю, бліны з верашчакай і смажанай каўбасой, кашы, крупнік і інш, дзе стравам надаваўся магічна-абрадавы сэнс.

Шчадрэц – вечар варажбы. Варажылі і дарослыя, і дзеці,  асабліва незамужнія дзяўчаты, якія хацелі даведацца, што іх чакае ў будучым годдзе.

Абрад «шчадравання» вызначаўся абыходам двароў гуртом шчадроўнікаў разам са «Шчодрай» – прыгожай дзяўчынай, якую апраналі ў святочнае адзенне. Спявалі песні-шчадроўкі, услаўлялі гаспадара з гаспадыняй, і іх гаспадарку.

 У Беларускім дзяржаўным музее народнай архітэктуры і побыту ў гэты дзень ладзілі традыцыйныя абрады шчадравання: «Цыганкі», «Шчодра». Таксама вучыліся танцаваць беларускія танцы, прынімалі ўдзел у розных калядных конкурсах! А самыя актыўныя ўдзельнікі атрымалі прызы ад музея!